第一次練波－－好熱呀！

by suu4leaf

今日，酷熱天氣警告，十幾個何東人依然係三點鐘曬到癲既時候跑去石硤尾練波！真係我地先做得出！暴曬左三個鐘！曬死左！最後都係決定下次遲一個鐘開始！

不過，都幾開心。雖然D體能同skills都無晒，不過可以再一齊打波，真係好開心。以前三兩日就一次練波，少不免會有不在狀態既時候；但依家一星期先一次，又難得可以一齊組隊，所以大家都打得開心投入。

我以為自己會完全唔記得D case同D走位，但係一埋位對腳竟然識自己郁（雖然好慢），真係神奇。不過，我每次都miss左個二壘（個條紅色毛毛真係唔掂，我完全睇佢唔到）。Sophie見我望住個地下，以為我跌左野，問我揾咩，我話我揾緊個二壘。其實唔係take唔到壘，而係因為見唔到個壘所以反應遲左。可唔可以整返塊壘板呢？用張紙板都好啦。

最後我地都係決定叫隊名做Ho Tung，咁樣我地可以叫返何東嘛，哈哈。少許撻皮之作。

第一次練波結論：1. 下次我要着短褲練波！2. 仲要帶冰水！3. 要認真考慮去做fitness……